A deputada do Grupo Popular e portavoz do PP en Betanzos, Cecilia Vázquez, visitou esta mañá a Pescadería Noli desta localidade para animar a todos os establecementos e comerciantes de peixe a participar no bono peixe, a campaña impulsada pola Xunta para incentivar o consumo deste produto fresco galego.

Cecilia Vázquez explicou que os comercios ou vendedores ambulantes de peixe e marisco fresco que desexen participar nesta campaña da Xunta poderán solicitar a súa inscrición desde mañá, venres, a través da páxina web www.bonopeixe.gal.

Así mesmo, as persoas interesadas en gozar do bono peixe poderán descargalo a partir do vindeiro 28 de xullo desde a citada plataforma ou na app móbil, dispoñible tanto para dispositivos Android como iOS.

PALIAR O DESCENSO DE CONSUMO

“Galicia volve impulsar unha iniciativa pioneira para fomentar o consumo de peixe e marisco frescos e galegos, produtos que son sinónimo de excelencia e calidade, ao tempo que se axuda a paliar o preocupante descenso no consumo destes alimentos que se está a rexistrar”, indicou a deputada popular.

Cada Bono Peixe terá un valor de 50 euros que se irán liberando progresivamente a través do desconto dun 25 por cento na compra realizada ata un máximo de 5 euros por semana, acumulando o importe non gastado nas sucesivas semanas ata un máximo de 25 euros, que poderán gastarse ao longo dun total de 10 semanas ou ata que se esgote o crédito.