O grupo municipal do Partido Popular no Concello de Neda mostrouse hoxe, a través do seu portavoz, Eduardo Pereira, contrario á instalación dun parque eólico en Caaveiro, e instou o rexedor socialista, Ángel Alvariño Saavedra, a que move ficha ante o Goberno Central para paralizar o proxecto posto en marcha polo executivo nacional.

Os populares levaron a cabo está reclamación despois de consultar na Delegación Territorial da Xunta de Galicia da Coruña polo estado da tramitación do este parque. “Sabemos que, a día de hoxe, está a estudarse a legalidade do proxecto, pero, polo que nos dixeron, todo fai indicar que está fóra das áreas de desenvolvemento eólico”, apuntou Pereira.

O papel da Xunta de Galicia
Neste sentido, o portavoz popular subliñou que a Xunta defende un desenvolvemento das enerxías renovables en xeral –e da eólica en particular– a través de proxectos que conten coas máximas garantías técnicas, xurídicas e ambientais. Deste xeito, dixo Pereira, non se poderán implantar parques eólicos fóra das áreas incluídas no Plan sectorial eólico de Galicia –a excepción de proxectos que teñan clara incidencia territorial pola súa entidade económica e social e posúan unha función vertebradora no territorio–, nin nos espazos da Rede Natura aprobada.

Ademais insistiu o popular, nunha clara aposta pola máxima transparencia e colaboración institucional, o Goberno autonómico está a crear redes de información provincial para que os concellos poidan coñecer os futuros proxectos eólicos que se van tramitar en Galicia antes de iniciar o seu procedemento administrativo.

“O que ten que facer o noso alcalde é deixar de estar escondido e plantar cara aos seus xefes provinciais, autonómicos e estatais. Os veciños de Neda elixírono para defender os intereses locais e non as cores do seu partido”, afirmou Pereira.

Ademais, o popular, que mañá domingo tomará parte nunha serie de charlas nas que debaterá a ideonidad da instalación ou non dun parque eólico nun lugar emblemático para a comarca como Caaveiro, incidiu en que o señor Alvariño Saavedra debería escoitar o clamor veciñal contra o desenvolvemento deste proxecto e tomar cartas no asunto para impedilo.

“O alcalde ten ante si unha boa oportunidade de facer algo bo por Neda. Desde o Partido Popular tendémoslle a man para facer fronte común, pero para iso deberá ser o suficientemente valente para enfrontarse ao señor González Formoso, Gonzalo Caballero e Pedro Sánchez”, concluíu Pereira.