A deputada do Partido Popular pola provincia de A Coruña, Carmen Pomar defendeu hoxe que os investimentos previstos pola Xunta de Galicia nos orzamentos autonómicos de 2027 para a comarca de Sanatigo de Compostela responden ás necesidades fundamentais da cidadanía, como o acceso á vivenda, a mellora das infraestruturas sanitarias e educativas e o reforzo das comunicacións.

Pomar salientou especialmente os 34,55 millóns de euros destinados a impulsar 695 vivendas públicas en Santiago, Ames e Teo, un investimento, dixo, que permitirá avanzar na ampliación da oferta residencial na capital galega e na súa área metropolitana.

Do total previsto, Santiago contará con 9,35 millóns de euros para 410 vivendas; O Milladoiro, en Ames, disporá de 18,7 millóns para 219 vivendas, e Teo contará con 6,5 millóns para avanzar na construción doutras 66.

Para Carmen Pomar, estas actuacións reflicten a importancia de manter a vivenda entre as prioridades do investimento público e de impulsar medidas que permitan ampliar progresivamente as posibilidades de acceso a un fogar.

“A vivenda é unha das principais preocupacións de moitas familias, especialmente das persoas mozas. Por iso, é importante que os orzamentos contemplen investimentos concretos para impulsar novas promocións públicas en Santiago e nos municipios da súa contorna. O reto é que estes recursos se traduzan en vivendas e en oportunidades reais para a cidadanía”, sinala.

MÁIS INVESTIMENTOS EN SANIDADE E EDUCACIÓN

A dirixente popular tamén puxo en valor os recursos previstos para continuar as actuacións no Hospital Clínico Universitario de Santiago e completar o equipamento do Centro de Protonterapia de Galicia.

As contas autonómicas, explicou, contemplan 4,58 millóns de euros para a ampliación do CHUS en 2027 e outros 8,9 millóns para completar o equipamento do centro de protonterapia, dúas actuacións relevantes para as infraestruturas sanitarias de Santiago.

No ámbito educativo, destacan os 12 millóns de euros previstos para a nova Facultade de Farmacia, xunto coas partidas destinadas a mellorar centros educativos e avanzar na renovación das instalacións.

“Santiago precisa seguir reforzando os seus servizos públicos e as súas infraestruturas. Os investimentos en sanidade e educación repercuten directamente na calidade de vida dos veciños e contribúen a manter o papel da cidade como referente sanitario, universitario e científico de Galicia”, afirmo Pomar.

IMPULSO A INNOVACIÓN E ÁS COMUNICACIÓNS

A deputada autonómicas referiuse tamén á dotación de 37,93 millóns de euros para a Fundación Centro Tecnolóxico de Supercomputación de Galicia (CESGA), vinculada ao desenvolvemento da supercomputación, a intelixencia artificial e outras tecnoloxías avanzadas.

A estas actuacións súmanse os investimentos previstos para continuar as obras da autovía Santiago-A Estrada, avanzar na conexión Santiago-Noia e mellorar a estrada AC-406 entre Portomouro e Santa Comba.

Na opinión de Pomar, estas actuacións contribúen a reforzar as conexións entre Santiago e a súa contorna, mellorar a mobilidade e favorecer o desenvolvemento económico dos municipios.

“Santiago e a súa área metropolitana precisan infraestruturas que acompañen o seu crecemento, faciliten os desprazamentos e xeren novas oportunidades. A vivenda, a sanidade, a educación, a innovación e as comunicacións son ámbitos esenciais para o futuro da nosa comarca”, sostivo.

Por último, Carmen Pomar considerou que as contas autonómicas deben valorarse tamén pola súa capacidade para dar resposta ás necesidades da cidadanía e converter as partidas orzamentarias en proxectos concretos.

“Estamos a falar de investimentos que afectan a cuestións fundamentais para as familias e para o desenvolvemento de Santiago. Agora é importante que as actuacións previstas avancen conforme aos prazos establecidos e que a cidadanía poida comprobar os seus resultados”, concluíu.