Reelixido presidente do Partido Popular  da provincia da Coruña o pasado mes de setembro, Diego Calvo aproveitou o seu discurso para incidir en aspectos que serían fundamentais para que a súa formación conseguise seguir crecendo a nivel electoral nas próximas citas coas urnas.

Unha delas pasaba por seguir escoitando de preto ás bases do partido para ensanchar unha formación que o presidente provincial quere facer chegar a todos e cada un dos recunchos dos 93 municipios da provincia.

Pasadas unhas semanas, e coa maquinaria xa a punto, Calvo non quixo esperar máis para arrincar os motores dunha formación que ten como obxectivo máis próximo recuperar o goberno das tres grandes cidades e, ademais, volver á presidencia da Deputación da Coruña.

Con todos estes retos en mente, Diego Calvo, acompañado polo secretario xeral provincial, Evaristo Ben, e mais o responsable de organización, Gonzalo Trenor, retomou nas últimas semanas unha nova rolda de comarcais polos concellos de Ordes, Boqueixón, Mugardos, Noia, Oleiros, Malpica e Betanzos que lle levaron a reunirse con alcaldes, portavoces, militantes e simpatizantes do Partido Popular.

En todos estes encontros, o dirixente provincial aproveitou para fixar a mente xa nas municipais do ano 2023, unha cita, dixo, que pode parecer moi afastada no calendario, pero que, canto a traballo, está xa en marcha. “Toca poñerse o mono de traballo unha vez máis. Agora é o momento de incidir máis que nunca en estar á beira dos nosos veciños, escoitalos, acercarnos aos seus problemas e tratar de coñecer o que demandan de nós”, dixo Calvo.

Ensanchar o partido na base

Neste sentido, o presidente provincial parouse na “necesidade” de continuar ensanchando o partido desde as bases para o que, dixo, é “fundamental” abrir as portas a todas aquelas persoas que teñan algo que achegar. “Aquí non sobra ninguén e son importantes todos os que veñan sumar. Sabemos o peso que ten a nosa formación na provincia, pero temos que aspirar a chegar cada vez a máis xente, persoas que están descontentas e que buscan unha alternativa que poden atopar en nós”, indicou.

Con máis ganas de gañar que nunca, e “orgulloso” de pertencer á familia dos populares, Calvo volveu cargar contra un Pedro Sánchez ao que responsabilizou da grave situación económica e social que atravesa España, e ao que culpou dos constantes malos tratos que sofre a provincia da Coruña. “Mentres sube a luz, mentres as nosas industrias cerran e mentres vemos como outras comunidades repártense os fondos co único argumento de manter a Sánchez na Moncloa, aquí nós temos que poñernos a traballar para terminar con este trato desde cada un dos nosos municipios”, apuntou.

Ofrecer solucións

Calvo tivo tempo tamén para explicar que o que a sociedade esixe nestes momentos. “Pídennos que sexamos un partido forte, unido, que lles axudemos unha vez máis nun momento difícil e que nos poñamos á fronte da recuperación”, subliñou o presidente popular, quen engadiu que, “pídennos que fagamos todo iso e que o fagamos unidos e ofrecéndolles solucións”.

Por último, o líder dos populares na provincia aproveitou para dar as grazas a todos e cada un dos presentes nas reunións polo traballo que realizan, á vez que lles pediu un novo esforzo. “Sei que é duro, que en moitos casos mesmo ingrato, pero temos nas nosas mans reverter esta situación”, subliñou, para concluír incidindo en que “entre todos imos conseguir os obxectivos que nos marcamos”.